أى بنت وهى داخلة على خطوة كبيرة  زى الجواز ، اول حاجة بتيجى فى دماغها هى انا عايزة اشترى كل حاجة و كأنى معنديش اى حاجة بالأساس ، و ده نتيجة احساس الفرحة الشديدة واللى بالتبعية بيتحول عند البنات لأحساس " انا نقاصنى حاجات كتيرة اوى – انا هنزل اشتريها " .طبعاً ، احنا مقدرين مشاعرك و احاسيسك و فرحتك بس عايزين نقولك كام حاجة تساعدك و انت بتشترى عشان تجيبى حاجات اسعارها مناسبة و كمان تبقى فعلاً هتستخدميها مش مجرد حاجة " لازم" تجبيها.

مفيش ميزانية؟! فيه مشكلة :

لازم تحددى ميزانيتك فى رحلتك كعروسة ، لازم تبقى عارفة هتصرفى ايه و فى ايه ! مش كل حاجة هينفع تجبيها و عشان تقدرى تجيبى كل احتياجت بيت الزوجية كمان ، خليكى ذكية و متجريش ورا اى حاجة غالية على الفاضى و ممكن متستخدميهاش كمان بعد الجواز. هاتى ورقة او استخدمى برنامج (الاكسيل) عشان تحددى هتصرفى قد ايه و فاضل قد ايه واولوياتك فى الشراء .

نصيحة: " اللى مجاش انهاردة هيجى بكره " عادى!

الله دى حلوة! انا هدخل اشتريها:

انسب اوقات الشراء فى مصر هى اوقات السيل. وموخراً المحلات كلها بتعمل مواسم تخفيضات كتيرة جداً ف اللى هتلاقيه دلوقتى ب 500ج ممكن يبقى بعد شهر ب 250ج ! ف ليه تضيعى الفلوس انك تشترى قطعة واحدة بدلاً من قطعتين او ثلاتة مثلاً . خدى لفة فى المحلات الاول و قارنى الاسعار و بعدين قررى الاول ايه فعلاً اللى لازم تشتريه دلوقتى و ايه اللى ممكن تصبرى عليه و تجبيه بسعر افضل .

نصيحة " متشتريش من اول محل يقابلك لأنه فى الغالب هتلاقى محلات فيها منتجات احلى بعد كده"

انا معنديش وقت كافى اشترى حاجة!

فى الغالب الموقف ده اللى بتتعرضله بنات بتشتغل ، بيبقوا بيشتغلوا كل يوم من 9 الى 5 مساءاً مثلاً، ف بالتالى بيشتروا بليل بعد الشغل " لو قادرين صحياً وذهنياً " او بيأجلوا كل مشاويرهم ليومين الاجازة اللى هما جمعة و سبت. احنا بننصحك لو انتى مش فاضية انك تشترى من مواقع التجارة الالكترونية فى مصر لأنك بكده هتشترى كل اللى انتى محتاجاه  هتوفر فى وقتك لحاجات اهم و كمان بنسبة 95% هى هتكون ارخص كمان ف بمعادلة بسيطة انتى اللى كسبانة حقيقى.

نصيحة " جربى فى قطعة واحدة لو قررتى تشترى اونلاين عشان تتأكدى و تكونى مطمنة و بعد كده تقدرى تشترى اكتر من قطعة "

انا هشترى حاجات غالية و تعيش معايا اطول !

مش شرط! شرائك لقطع غالية مش دايماً معناه انها هتعيش معاكى اطول ، احنا بننخدع بأسامى كبيرة لمجرد انا بتديكى المنتج و بتديكى معاها احساسك ايه و انتى لابسها و ده ذكاء من اصحاب المحلات طبعاُ، بس انتى عروسة و لازم تبقى فاهمة ايه تدفعى فيه فلوس كتيرة وايه ممكن متتدفعيش فيه غير المناسب بس.

لانجيرى كتير الفترة اللى جاية!

اشترى كل ما يتعلق بملابس البيت ، لانجيرى ، بيجامات ، ملابس استقبال ضيوف . بس خدى بالك انه الافضل تدفعى 1000 ج على اربع حاجات بدلاً من 1000ج على قطعة لانجيرى واحدة و الفرق بينهم صفر ! نفس الخامة ، نفس الجودة ، نفس التصميمات . خدى بالك وانتى بتدفعى الفلوس .

اشترى ايه؟!

اشترى ملابس نوم مناسبة لحد بعد سنة من جوازك ، لانجيرى اسعاره مناسبة و مش غالى لانه فى الغالب ذوقك هيتغير ، برفان او اتنين ، ملابس خروج تناسب فصل الشتاء لانع فى الغالب الحاجات دى بتغلى من موسم للتانى ، مستحضرات تجميلية مش كتيرة عشان تاريخ الصلاحية ، لبس رياضى لو بتلعبى رياضة اولو بتحبى تنزلى وانت لابسة لبس مريح. غير كده ممكن يتجاب فى اى وقت مش شرط قبل الجواز .

اشترى منين :

كل المنتجات اللى ذكرتها فى فقرة "اشترى ايه؟" ممكن تشتريها بنص الثمن من مواقع التجارة الالكترونية لأنهم دايماً عندهم عروض مستمرة و تخفيضات كويسة جداً و متنسيش تقرأى اراء الناس اللى اشتريت من عندهم قبل كده.

ختاماً : حولى دايماً تبقى وسطية فى اختياراتك. و حاولى تدفعى فلوسك فى المكان الصح اللى فعلاً هيديكى تجربة تسوق كاملة مش مجرد تشترى قطعة و خلاص